БЯЖЫ!

Блог пра тое, як узяць сябе ў рукі
і пачаць бегаць

Што рабіць, каб не калола ў баку?

Востры боль у баку, быццам туды ўторкнулі ржавы цвік – гэта адна з прычынаў, чаму людзі ненавідзяць бег! Прыемнага сапраўды нічога ў гэтым няма, таму давайце разбірацца – што гэта баліць, чаму і як зрабіць, каб не балела. Ніколі.

Калоць можа ў правым баку, можа ў левым, можа вышэй за жывот – амаль у грудзях, але знізу. Ва ўсіх выпадках гэта розны органы перадаюць «прывітанне» ранеру.

Боль – гэта заўсёды сігнал. І трэба гэты сігнал пачуць, зразумець і адрэагаваць.

Справа баліць пячонка. Злева – селязёнка. А ўсярэдзіне, проста пад лёгкімі – дыяфрагма. Калі ў вас няма хранічных захворванняў унутраных органаў, то прычына такіх сімптомаў і спосабы супрацьдзеяння, па-сутнасці, адны і тыя ж.

Калі падчас прабежкі закалола ў баку, першае, што вы мусіце зрабіць – збавіць тэмп! Нават з пераходам на кроку ці поўнае спыненне. Не бегайце, церпячы боль! Ніколі!

Калі баліць усярэдзіне, практычна ў грудзях (дыяфрагма), то трэба збавіць тэмп і паспрабаваць рабіць выдах у той момант, калі вы ступаеце на левую нагу, ды дыхаць глыбей. Можа гучаць неверагодна, але мне дапамагае. Скідванне тэмпу – дакладна дапаможа.

Баліць бок? Збаўце тэмп! А часам варта нават спыніцца!

Боль у печані ці селязёнцы «лечыцца» тым жа самым зніжэннем тэмпу. Дачакайцеся нармалізацыі дыхання, дачакайцеся. Пакуль боль цалкам пройдзе. І працягвайце прабежку, але ў вельмі лагодным тэмпе. Інакш забаліць ізноў.

Прычынаю болю можа быць недастатковая размінка і разаграванне перад прабежкаю, а таксама перапоўнены страўнік.

Адпаведна, не распачынайце трэніроўку раней, чым праз 30-40 хвілінаў пасля ежы (гэта калі лёгкі перакус, пасля цяжкага абеду з баршчом, бульбачкай і двума катлетамі, лепш пачакаць з паўтары гадзіны). І зрабіць добры разагрэў, каб арганізм настроіўся на высілак.

Калі вы будзеце рэгулярна трэніравацца, то сутыкацца з болем у баку вы будзеце ўсё радзей. Або ўвогуле забудзеце, што гэта такое. Боль у баку найчасцей здараецца ў нетрэніраваных асобаў, з кожнай новай трэніроўкаю будзе расці вашая вынослівасць і гатовасць арганізму да нагрузак.