БЯЖЫ!

Блог пра тое, як узяць сябе ў рукі
і пачаць бегаць
А цяпер сапраўды важнае: бегаць і не «ўгрохаць» сваё сэрца
Навошта і як пільнаваць пульс падчас трэніровак? Ці трэба гэта рабіць навічкам?
Бег дапамагае рабіць вашае сэрца мацнейшым, перадусім – рэгулярныя трэніроўкі. Але непрыемны сюрпрыз – сэрцу можна нашкодзіць!

З уласнага досведу: за мною ўжо была першая «дзясятка» і паўмарафон, хуткасць, сіла і дыстанцыі павялічваліся, што мяне вельмі цешыла. Вось толькі большасць трэніровак адбывалася ў маім любімым тэмпе 5:20, а сэрца працавала на мяжы «памаранчавага» і «чырвонага» рэжымаў – фактычна, у стане стрэсу, на знос, калі гаворка ідзе пра доўгія дыстанцыі.
Калі вы не хочаце скончыць адзін са сваіх забегаў у машыне хуткай дапамогі, паклапаціцеся пра сваё сэрца!
Ніжэй я распавяду пра тое, якім мае быць пульс падчас трэніровак і як можна вызначыць свае індывідуальныя нормы, а таксама пра тое, як пільнаваць пульс падчас прабежак. Але спачатку – вельмі коратка – чаму гэта важна.

Спрашчаючы, наш арганізм падчас трэніроўкі працуе або ў аэробным рэжыме, або анаэробным рэжыме.
Тыпы трэніровак
Аэробная трэніроўка
Ваш арганізм для выпрацоўкі энергіі выкарыстоўвае кісларод і глюкозу, узмацняецца сэрца, паляпшаецца цыркуляцыя крыві. Такія трэніроўкі развіваюць вынослівасць.
Анаэробная трэніроўка:
Арганізм працуе на мяжы сваіх магчымасцяў, кіслароду бракуе для выпрацоўкі энергіі, падключаюцца рэзервы. Гэтыя трэніроўкі развіваюць сілу і хуткасць. Працяглы анаэробны бег можа нашкодзіць сэрцу, таму гэтки бег мае быць кароткім і чаргавацца з аэробным.
Вось тут нам і патрэбна ведаць свой пульс, які дакладна дапаможа высветліць, у якім рэжыме працуе ваш арганізм. Хочаце паказваць добрыя вынікі і пры гэтым не «ўгрохаць» сваё сэрца? Рабіце націск на аэробныя трэніроўкі.
Спачатку можа быць псіхалагічна цяжка: вы ведаеце, што можаце бегчы хутка, але каб утрымліваць пульс у межах аэробнай трэніроўкі, даводзіцца ледзь-ледзь ташчыцца, а то і ўвогуле пераходзіць на крок!

Аднак рэгулярныя працяглыя аэробныя прабежкі з часам дапамогуць вам падняць планку і бегчы хутчэй з ніжэйшым пульсам.

Ёсць і добрыя навіны – калі хочацца бегчы хутка, бегайце! Але – непрацяглы час. Інтэрвальны бег дасць вам нагрузку, калі вы яе прагнеце. Але не «саджайце» сваё сэрца рэгулярнымі забегамі ў 5-10-15 км з пульсам у «памаранчавай» зоне.

Каб даведацца, якім мае быць ваш пульс для розных відаў трэніровак, можна скарыстацца з адмысловых калькулятараў, напрыклад, як гэты.
Што вы бачыце на фота? Ідэальны жывот? А там яшчэ і пульсометр!
А вось каб дакладна мераць свой пульс падчас прабежак, прыйдзецца купіць пульсометр – адмысловы спартовы гадзіннік, які мерае пульс проста на руцэ (больш сучасныя і дарагія мадэлі), або з асобным датчыкам, які мацуецца на грудзях.

Калі такой магчымасці цяпер няма, то да пакупкі можна бегаць у аэробнай зоне наўскідку. Калі падчас прабежкі вы можаце дыхаць праз нос ды вымавіць без задышкі доўгі, у 10 словаў сказ, значыць, вы ў аэробнай зоне, развіваеце вынослівасць і падымаеце планку прадукцыйнасці ўсяго арганізму. Сэрца вам за гэта аддзячыць доўгімі гадамі бесперабойнай працы ;)

А пра тое, як выбраць недарагі пульсометр - неўзабаве на 42km.belsat.eu!

Made on
Tilda