БЯЖЫ!

Блог пра тое, як узяць сябе ў рукі
і пачаць бегаць
Бегавыя красоўкі – казачкі ад маркетолагаў?
Як я забыўся на боль у каленях
Так-так, людзі тысячагоддзямі бегалі і неяк абыходзіліся без ультрасучасных тэхналогіяў з нана-пеннымі падэшвамі, узмоцненымі спецыяльнымі палімернымі ўкладкамі. Дык што, можа хопіць звычайных кедаў?

Я пачынаў бегаць з перакананнем, што гэта самы «дэмакратычны» від спорту: зашнураваў красоўкі і пабег! Дастаткова, каб абутак быў зручны і лёгкі.

Нашыя продкі сапраўды абыходзіліся без красовак і цудоўна сабе бегалі. Толькі паправачка: яны не сядзелі за кампʼютарамі па 8-10 гадзінаў штодня, не ездзілі на працу на метро ці ўласным аўтам і, урэшце, не бегалі выключна па цвёрдым асфальце.

Але я не думаў пра гэта. Я проста бегаў. Спачатку 3 кіламетры, потым 5, потым 8. А потым здарылася «ой»: пачалі балець калені. Аднойчы я проста фізічна не змог працягнуць прабежку, больш за тое, нават спыненне бегу не дапамагло. Да дому ледзь дакавыляў. А цягам наступных 5-6 дзён стаўся ярым прыхільнікам безбарʼернага асяроддзя: спуск у метро быў неверагодна балючым здарэннем.

Мой фэйсбучны «бегавы сябар» Дзяніс Васількоў параіў, цытуючы літаральна «не жмоціцца і раз выдаць грошы на прыстойныя бегавыя красоўкі». Дагэтуль я бегаў у «трэнінгавых» красоўках Everlast, па вялікімі рахунку, універсальных, але вельмі зручных.

Працягваць трэніроўкі хацелася. А працягу болю ў суставах – не.

Перакапаўшы 100500 артыкулаў пра красоўкі ў інтэрнэце (у асноўных рэкламных або схавана-рэкламных), выправіўся ў спартовую краму, каб патрымаць у руках, прымераць на нагу.

Бегавыя красоўкі - неабходнасць. Калі вам яшчэ патрэбныя вашыя суставы.
Самыя дарагія – не значыць найлепшыя для вас асабіста, памятайце пра гэта. Выбіраючы свае красоўкі, я вырашыў не глядзець на цэннік, каб не трапіць у пастку «гэтыя даражэйшыя, відаць яны і лепшыя». У апісанні я выбіраў тыя красоўкі, што забяспечваюць добрую амартызацыю і рэкмандаваныя для бегу па цвёрдай паверхні. Далей адсейваў выключна паводле таго, як красоўкі «сядзелі» на назе, наколькі камфортна ў іх было хадзіць. У самых класных нават давазляў сабе прабежку ўздоўж прылаўку проста ў краме :)

У выніку суворага і вельмі субʼектыўнага адбору перамагла адна з мадэляў Asics, прычым не самая дарагая. Дзякуючы добрым красоўкам я забыўся на боль у суставах. І вам вельмі раю:

беражыце свае ногі, адшкадуйце раз на нейкі час грошы на добры абутак. Фірмовыя красоўкі паслужаць вам не адну сотню кіламетраў.
Іх можна мыць у пральцы і яны пры гэтым не разваляцца.

Карыстаюся сваймі каля 7-8 месяцаў, бегаў узімку і ўлетку, трэніроўкі і забегі. Неўзабаве надыдзе час і давядзецца спраўдзіць іх на адлегласць больш за 30 км запар. Калі «залік» – то ў іх я пабягу і свой першы марафон у Афінах.

P.S.: Суперпупер-красоўкі не зробяць з вас суперпупер-ранера. Усё – толькі дзякуючы моцнаму духу, упартасці і энергіі малых крокаў!

Made on
Tilda